جميع الأوقات تستخدم GMT + 3 ساعات

آخر المشاركات
    .. كسلا الوريفة ..     »  قد يباع التاريخ في كسلا   .:.  اخر رد: عبدو منصور  .:. الردود: 69     .. كسلا الوريفة ..     »  عالم زين   .:.  اخر رد: يوسف حسن العوض  .:. الردود: 0     .. كسلا الوريفة ..     »  حيرة   .:.  اخر رد: الدرديري كباشي الامين  .:. الردود: 560     .. كسلا الوريفة ..     »  اشتقنالك   .:.  اخر رد: خالد عوض السيد  .:. الردود: 0     .. كسلا الوريفة ..     »  الخواء /قصه قصيره   .:.  اخر رد: فايز النورس  .:. الردود: 1     .. كسلا الوريفة ..     »  يا أحبابي أنا جيتكم مهرول   .:.  اخر رد: ابو اسيل  .:. الردود: 9     .. كسلا الوريفة ..     »  دعوة لوالى كسلا في يوم السياحة العالمي   .:.  اخر رد: عبدو منصور  .:. الردود: 1     .. كسلا الوريفة ..     »  قرع طبول في الأحراش (قصة قصيره)   .:.  اخر رد: فايز النورس  .:. الردود: 0     .. كسلا الوريفة ..     »  أيام زمان .. نسخة جديدة منقحة   .:.  اخر رد: الدرديري كباشي الامين  .:. الردود: 221     .. كسلا الوريفة ..     »  شهادة الترابي .. كاد المريب ان يقول خذوني   .:.  اخر رد: عبدو منصور  .:. الردود: 1


إرسال موضوع جديد هذا الموضوع مغلق ، لا تستطيع تعديله أو إضافة الردود عليه  [ 95 مشاركة ]  الانتقال إلى صفحة السابق  1, 2, 3, 4, 5, 6  التالي
الكاتب رسالة
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 10 أكتوبر 2008, 16:00 
مشرف منتدى
صورة العضو الشخصية
غير متصل

اشترك في: 01 فبراير 2008, 14:20
مشاركات: 980
مواضيع: 51
مكان: قطـــر
فيصل H كتب:

دبايوا " ايتانينا "ا كوبام " مسقاقروا " لاباري.

حبيبنا ابوعثمان .كل عام وأنت بخير

1/اخر اجازة كانت لك الي كسلا متي

2/وماهي هواياتك مع السفـــر والغربـــة

3/هل زرت منطقة جمام ومتي


ياجماعة هوي اليوم الجبنة تحت ضل المنقة فى الساقية.. متعال رش المكان .. شيكيت ولع النار وهب الفحم..
ويا صلاح الطاش نجض الفشار.. ويا صلاح مصطفى أها هاك القربة أو السقو ده وأملاه من ماسورة حوض البابور وعلقها فى عود المنقة ده.. اليوم يا جماعة مناسبتنا والله سعيدة جداً جداً.. عندنا ضيف جايي والله العظيم من سلطنة عمان على الطائرة العمانية وسوف ينزل فى مطار كسلا الدولي.. يمشى أولاً يسلم على أهلو.. وبعدين يجينا ياخد ليهو كم فنجان قهوة من جبنتنا دى.. وبالمناسبة حا أزيد ليكم دواء البن الجنزبيل لأنو أخونا أزرق جايي طيران والأضنين مليانات هواء طيران ورحلة طويلة ومتعبة علشان كده سوف ندنكل ليهو جبنة على المزاج.. أهلاً والحمد لله على سلامة وصولك يا أخونا أزرق.. بركة الجيت بالسلامة وجيداً جيت.. وكدى تعال بيجاي أجلس فوق البنبر المنسوع أمبارح ده.. ويا متعال كدى أدخل الجنينة دي وجيب للجماعة وخاصة الضيوف كم حبات جوافة وكمية من اليوسف أفندي وكمان ما تنسى تمشى بهناك تجيب معاك شوية برتكان .. اليوم محتفلين بأخونا أزرق.. وكدى قبل ما نكب ليهو البكري أدوه الفاكهة ده يقزقز بيها وأملوا ليهو القرعة دى من السقو شايفوا أنا عطشانشلاليفوا ناشفة.. يا شيكيت بعدين كب للراجل الضيف البكرى وطبق ليهو الحكاية.. أها شفت يا شيكيت أخونا أزرق زول أصلى ويعرف طقوس الجبنة .. أهو شوف عيني رفض يشرب بفنجانا.. حرّم مرق فنجانو من صديريتو.. معناه الزول ده كييف جبنة من الدرجة الأولى.ز أهو الحكاية كده ولا بلاش.. كبوا للضيف التنوة ودبل للضيوف التانيين من البكرى.. ولحقوا أخونا أزرق البركة.. وبعدين شفتوا يا جماعة أخونا ازرق عندو شوية أسئلة.. الراجل تب ما نسى كسلا وما نسى ما تعانيه كسلا فى جميع المرافق.. أولاً يا أخوى أزرق أنا ويكفينا الله من شر قولة أنا.. أنا بسافر فى السنة مرتين وثلاثة مرات للأهل فى السودان .. وبتفقد كل الأهل وبواسى الناس كلهم فى أفراحهم وأتراحهم.. تب يا زول ما قاعد أنسى لي زول.. وآخرة مرة قبل شهرين.. وكمان ناوى أسافر قبل عيد الأضحى لأنو عندى النية السنة دى أدي فريضة الحج مع أم العيال وأولادها.. شفت بالله الغلبة الحنقع فوقها.. يا شيكيت طبق للراجل خليني أجاوب ليهو على سؤاله الثاني عن الهواية والسفر والغربة.. هوايتى القراءة وخاصة الكتب من الألف إلى الياء والسفر فيه فوائد جمة وعديدة ولكنه قطعة من نار.. والغربة نار قد إكتوينا بها وهى حارة ولطول مدة الغربة فقد فقدت الإحساس بذلك.. يا سلام على جمام وأبارها وغابتها.. زرت جمام بعد إستقلال السودان عام 1958م وأنا طالب فى المدرسة الإبتدائية حيث قامت المدرسة آنذاك برحلة مدرسية إلى جمام وكانت لمدة يوم واحد.. ولا أنساه أبداً.. وزرتها عام ما أقول ليك عام 1972م أو عام 1973م عندما كنت مشرفاً على أحد مجموعات التعداد السكاني لشمال كسلا.. حيث أحصينا السكان إبتداءاً من كلهوت وكوليل وهمساييب وأروما ومكلي ووقر وسلام عليكم ورباكاسا وأخيراً جمام التى عملت مع شيخها آنذاك صداقة وود وهو الشيخ موسى كرشوب الذى كنت أقابله عندما يأتي لسوق كسلا.. والآن أصبحت جمام واحة زراعية واسعة على إمتداد البصر بالموز وشتى انواع الخضار من طماطم وغيره.. يا جماعة أخونا ازرق مستعجل كبوا ليهو البركة.. لأنو خلاص عاوز يمشى.. يا الله فى وداعة الله أخونا أزرق.. وإذا كان إجازتك شوية طويلة بالله تمر علينا فى منتدى الجبنة.. وأكان ما عندك مواصلات أخونا صلاح الطاش يجيبك بعجلتو الما فيها رفارف وفرامل.. وفتك بعافية يا أزرق..






العم : فيصلH" تحياتي لك واتمني من الله عزوجل ان يديم عليك الصحة

وانشاء الله حج بروكأ وسعيأ مشكورأ وذنبأ مغفورأ انشأء الله وليك

وطول العمر وربناء مايحرمناء منك ولامن طلاتك ولامن قلمك

وياعمنا قصة الفنجال هي حقيقية والان موجود معي

وليك الف شكر وماتنسي المرة الجاية معانا في الختمية

وفوتك بعافية وسلام ...



ليس لديك الصلاحية لمشاهدة المرفقات

_________________


رَبَّنَا أَفْرِغْ عَلَيْنَا صَبْرًا وَثَبِّتْ أَقْدَامَنَا وَانصُرْنَا عَلَى الْقَوْمِ الْكَافِرِينَ


آخر تعديل بواسطة ازرق جعفر عثمان في 13 أكتوبر 2008, 21:06، عدل 1 مرة

أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 10 أكتوبر 2008, 19:33 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

الأخ فيصل

عربي تكتينا

الأخ اوهاج

آوو اكتن.


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 10 أكتوبر 2008, 19:51 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59


انا من المحبين لكسلا وناس كسلا وجبنة كسلا وكل ملديه صلة بكسلا وأهديكم هذه الابيات:
ثلاثة زادت كسلا جمالاً علي جمالها جبال التاكا التي يتخيلها الهابط من أعلي كالحسناء التي برزت نهديها لترضع القمر
ونهر القاش الذي لف خصر كسلا فزرعتم علي شاطئه فاكهةً وأباُ متاعاً لكم ولانعامكم
وأنت الذي زدت كسلا جمالاً علي جمالها
والتحية والتجلة لكل من له صلةص بكسلا

الأخ الجعلي ود المتمة
أولاً: تشكر على حضوركم لنا فى توتيل لتناول فنجان جبنة بكري مع التنوة وكمان البركة تحت سفوح جبال التاكا.. وأكان ما عجبك المكان نوديك على ضفاف نهر القاش بخضرته وأكان برضو المقام لم يطيب لك لترتشف معنا الجبنة هناك نوديك كمان منطقة السواقي بكل إتجاهاتها الجنوبية، الشمالية، تكروف والسواقي الشرقية..
ثانياً: نثمن لكم حبكم وتقديركم اللامحدود وحبكم لكسلا وأهلها.. الظاهر يا جماعة ضيفنا ود المتمة صرته مدفونة في كسلا.. فنشكرك على شعوركم النبيل نحو كسلا.. ونتمنى أن تكون قد زرتها قبل ذلك مرات ومرات..
يا شيكيت ويا جماعة جانا ود المتمة ضيف علينا وسيأخذ أيام معانا فى كسلا.. يا متعال جهز العربية من بنزين وزيت وخلافه علشان نفسح ود المتمة في ربوع كسلا علشان يرجع لمتمة ودسعد مبسوط من كسلا ومتكيف من جبنتنا.. يا شيكيت رش المكان ويا صلاح مصطفي دق البن وولع البخور.. يا عمنا الطيب زولنا ده كدى أديهو قرعة مليانة من روب كسلا وكباية موية من الزير داك التحت النيمة.. يا متعال جلس الجعلي جنبك.. ويا شيكيت كب البكرى للضيف وتني ليهو وما تكتر ليهو السكر.. أها يا جماعة نشوف ضيفنا ده بعد ما إتكيف عاوزنو يتكلم لينا شوية بصفة خاصة عن المتمة وعن زعيمهم عبد الله ودسعد رحمه الله، وبصفة عامة عن بلاد الجعليين.. يا شيكيت هب النار وخلي الجبنة التنوة تفور وأول زول تكب ليهو زولنا بتاع المتمة وتنوتنا يا الجعلي حرّم زي البكري.. هاك كدى أشفط التنوة دى..
شوف عيني يا جماعة الجعلي بعد ما شرب التنوة راسو وجسمو جرى موية من قوة جبنة كسلا.. يا سلام شكر الله الصانع.. أها يا جماعة من باكر نقوم بعربية متعال نفسح أخونا ود المتمة في جميع ربوع كسلا.. والعصر باكر إن شاء الله نسوى ليهو الجبنة في الختمية لأنو عازمن جميعنا أخونا أزرق جعفر عثمان وطبعاً ناس الختمية جبنتهم تخلي الكافر يسلم من قوتها الشديدة... كب صلاح مصطفى البركة للجعلي خلو يتكيف عديل.. يا صلاح الطاش مالك جيت متأخر اليوم للجبنة الظاهر عليك عجلتك عديمة الرفارف والفرامل قالوا نزلت ومشيت بيها سوق غرب القاش ترقعها.. أها هاك البركة دى لزوم القريفة..


أعلى
 ;
 
 عنوان المشاركة: Re: فنجان جبنة في توتيل مع الأستاذ فيصل H
مشاركةمرسل: 11 أكتوبر 2008, 07:09 
كسلاوي نشيط
كسلاوي نشيط
غير متصل

اشترك في: 25 سبتمبر 2008, 07:13
مشاركات: 84
مواضيع: 12

الأخ فيصل

يميل قلمي احتراما وتقديرا لما لمستة من ابداع........

O'Huj


أعلى
 ;
 
 عنوان المشاركة: Re: فنجان جبنة في توتيل مع الأستاذ فيصل H
مشاركةمرسل: 11 أكتوبر 2008, 10:52 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 05 أكتوبر 2008, 09:40
مشاركات: 2364
مواضيع: 258
عمنا ابو الفصول
لك التحية والتقدير علي مابذلته من جهد ومثابرة في هذه الحياه ولكن طفولة زمان
وان كنا بنسمع بها من الاهل . تبقي هي نبراس يضئ لهم لياليهم المظلمة مع الذكريات
وحقيقة طفولتك دايرة ليها مؤلف لانها سيناريو جاهز
ورايك شنو ترشح شيكيت لهذا السيناريو

ودمت دوما وربنا يوفقك ليك اولادك ومايتعبو زي ماابوهم تعب كده

_________________
ان يكن صمتى رهيبا .. إن فى الصمت كلاما


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 16 أكتوبر 2008, 20:02 
كسلاوي نشيط
كسلاوي نشيط
غير متصل

اشترك في: 21 أغسطس 2008, 12:58
مشاركات: 67
مواضيع: 7
بسم الله الرحمن الرحيمالأخ فيصل إتش لك التحية على هذه الحكاوى التي نتوق إلى سماعها ولا نملها فكلنا مر بمثل هذه الطفولة الحلوة والحياة القاسية الصعبة وما كان لنا من ملجأ إلا جبنة مدنكلة تشربها مع حبوبتك وباقي ناس البيت يحمّروا ليك بس ما قادرين يقولوا حاجة خايفين منها ، المهم أنك أثرت فينا شجوناً كدنا أن ننساها فأرجو أن تواصل حكاواك خاصة ما يتعلق بالطفولة منها وما هو سر الإتش هذه هل هي قحة ولا حاجة تانية، ولك الود .

_________________
لسانك لا تذكر به عورة إمرئ فكلك عورات وللناس ألسن
وعينك إن أبدت إليك مساوئاًفدعها وقل ياعين للناس أعين


أعلى
 ;
 
 عنوان المشاركة: Re: فنجان جبنة في توتيل مع الأستاذ فيصل H
مشاركةمرسل: 17 أكتوبر 2008, 21:18 
مراقب عام
صورة العضو الشخصية
غير متصل

اشترك في: 18 فبراير 2008, 13:37
مشاركات: 2947
مواضيع: 305
الأستاذ فيصل عثمان الحاج صديق حاج نور محمد أحمد نعيم

شهران ونحن نستمتع بهذه الجلسة الكسلاوية الظريفة والرائعة....

شربنا وما خلينا لينا "حبة بن لافة"

استمتعنا وارتشفنا من نبع معينك الصافي الذي لا ينضب
ذكريات و"هترشات" أحياناً زادت الجلسة روعة وجمال في سرد شيق

أها يا اخوانا الراجل دا قال ووووووووووووووب حنسلم الراية لمنو؟

الأستاذ فيصل لا عدمناك ولكن هي سنة هذا "الفنجان" الكسلاوي الرائع ..

جاء الدور لك أن تولي القيادة لمن ترشحه أنت فلك الخيار الأول في الترشيح
بس اتجنب لينا الجماعة القعدوا في الكرسي دا قبل كدا.....

لا عدمناك رائعاً دوماً ولا فض الله فوك

لك تحياتي وتقبل خالص الود والاحترام

_________________
فلنجعل تلاقينا بابَ خيرٍ وعطاء من أجل كســـلا
صورة


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 18 أكتوبر 2008, 17:48 
الرواد الختو الساس
الرواد الختو الساس
صورة العضو الشخصية
غير متصل

اشترك في: 22 فبراير 2007, 00:56
مشاركات: 873
مواضيع: 122
مكان: مكـــة المكرمة (وادي فاطمة)
الأخ عبد المتعال فعلاً أخونا فيصل كان ممتع بدرجة (حبوبة) في ريعان (خريفها ) :lol: :D ...
وقد إستمتعنا برشف الجبنة معه بكل إبداعه الذي لم يخلو من بعض الهترشة وهي
ميزة محتكرة ( للحبوبات) ولا مش كدى يا حبيبنا H :lol: ... لك الشكر على الوقت الجميل
الذي قضيناه في معيتك ... أخوي فيصل داير أحرشك على زول .. رأيك شنو ؟؟

في واحد أخونا كلامو عجن يا سلام عليكم الله .... خلوني
عليكم الله خلوني .....

خلوني عليهو ... واحد أخونا إسمو يبدأ (بمحجوب) وآخرو ( أبو هالة )
أها قلت شنووووووووووو ؟؟؟؟؟؟

_________________
كلــما اتـســـــــــــعت الـرؤيا ضاقـــــــــت العــــــــــبارة


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 19 أكتوبر 2008, 11:27 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

يا أخواني ويا حباني العزاز... الظاهر الكشة ظهرت وشايفها قادمة لجبنة H
وناس الكشة عاوزين يا جماعة يشيلوا عدة الجبنة والكانون والبنابر وحجتهم
أن دخان هذه الجبنة قد لوث البيئة نظراً لإشتعال نارها يومياً ..
يا اخوى عبد المتعال كدى أدينا شوية نفس حتى نرد لباقي الأخوان وبعدين
نشوف باقي الكتاب فيهو شنو... وشنو الضيق ده (ضيق النفساء على جناها)
والمرة الجاية كلكم معزومين عندى جبنة فى أويتلا.. وفتكم بعافية..


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 22 أكتوبر 2008, 19:58 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

الأخ عبد المتعال

اليوم يا اخوي معزوم مع الجماعة جبنة على ضفاف نهر القاش فى عصراوية تجنن جن... بالله شوف السحاب والعفرت مارى بالجبل كيف؟ وقعدتنا فى الرملة بجانب خور القاش.. وشوفوا يا جماعة الليلة القاش مليان كيف؟ أظنو الليلة مربعن.. بالله يا أخواني شوفوا الرملة دي صاقطة كيف تقول تلج بس.. كدى يا جماعة أفرشوا البروش.. ويا ود الفحل عليك الله هب النار.. ويا شيكيت دق البن ده.. ويا شحوتاي أسقى الجماعة ديل موية من الجمامة دى الفى طرف القاش.. والماداير موية الجمامة أديهو بالقرعة ديك مع القربة المعلقة في شجرة المسكيت الجنبنا دي.
كدي يا متعال تعال قنب جنبي فى المصلاية دي.. ويا شيكيت كب للجماعة البكرى وأضبط رؤوس الجماعة بالبكرى والتنوة والبركة.. الجماعة شايفهم بدأ عليهم النعاس.. الظاهر همبريب القاش ضربهم وواحدين دايرين ينوموا عديل..
يا جماعة هوى أسمعوا والله العظيم عبد المتعال كييف جبنة نمرة واحد.. شوفوا يا جماعة حرّم طلع الفنجان من سديريتو.. يا اخوى زولك مولود في قرية وقر وسط ناس وأهل الجبنة الحقيقين.. وقالوا زولنا ده الجايي من وقر فطموه بفنجان جبنة تنوة..
أها يا أخوى صلاح الطاش قوم وصل عبد المتعال لشارع المواصلات في عجلتك خالية الرفارف والفرامل وأعمل حسابك ضيفنا عبد المتعال ما يقع من العجلة.. الزول ده أمانة فى رقبتنا لغاية ما يصل بيتو بالسلامة.. وبعدين يا ود الطاش أعمل حسابك من جيرانا الساكنين جنبنا ديل، عندهم جنس كلب صعب وهوهاو أوعا يعضي ضيفنا عبد المتعال وخت فى بالك أنو مصل سعر الكلاب ما موجود فى كل كسلا,,,
أها يا متعال مع السلامة والمرة الجاية تعال من بدري لأنو عازمين أخونا نور الدين الفحل فنجان جبنة خاصة جداً.. وفتك بعافية..


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 22 أكتوبر 2008, 20:21 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

الأخ نور الدين الفحل

هوى يا جماعة .. يا شيكيت وود الطاش والطيب محمود النور وحسن حامد وأزرق والجعلي الذى أتانا مرة واحدة من المتمة وتاني زاغ مننا من شدة قوة جبنتنا دايخ لى هسع.. وضيفنا اليوم يا جماعة أخونا مدمن الجبنات ود الفحل.. زولكم الجبنة عموماً أكان ما شربلو منها فنجان تمسكو أم هلا هلا وتمسكوا دوخة وقريفة شديدة خلاص.. أها يا جماعة نمشي نقنب تحت أشجار المنقة الجنب البابور حقنا..
أها يا جماعة إتفضلوا لي قدام ... وواحدين يقعدوا في البنابر ديل وواحدين يقعدوا في العناقريب الهبابيات ديل، حرّم جداد إشتريناهم اليوم من سوق السعافة جنب الزريبة، وغالية جداً لأنو السعف إنعدم فى كسلا لصناعة الحبال البينسعوا بيها العناقريب الهبابيات..
هب النار يا ود الطاش وجهزوا الجبنة، أظنو بوري العربية دي صوت بورى عربة ود الفحل.. أها يا جماعة قوموا كلكم نستقبل ضيفنا ود الفحل.. زولكم جانا بالبرنسة موديل:78م.. يا زول وقف عربيتك تحت المنقة البلدية ديك.. إتفضل يا ود الفحل لى قدام.. شرفتنا وشرفت جبنتنا يا زعيم.. يا عبد المتعال كب البكري للجماعة.. ودّبل البكري لأخونا ود الفحل.. زولك شايفوا مدروخ من عدم الجبنة، لأنو راح متأخر الصباح لجبنة أم الحفر ولقاها كملت.. زولنا جايي من الشرق وكمان من حلة أبو خمسة أو حلة شلن.. يا ود الفحل الشفط ده شنو ، الظاهر عليك يومين ما ضقلك فنجان جبنة.. أها يا جماعة شوفوا زولنا عرق كيف؟ ألحقوه بالتنوة.. ويا أخونا حسن حامد هاك السلطانية دي، ألحق زولنا بكورية موية من القربة ديك، لعل العرق يجف من اخونا شوية.. شايف يا ود الفحل جبنتنا ساموطية كيف؟ أها في وداعة الله يا ود الفحل.. وناس المدينة شيلون معاك في البكسي.. وباكر يا جماعة تجوا من عصراً بدري.,. لأننا عازمين ضيف عزيز جايي إجازة قصيرة لكسلا من قطر.. وفتكم بعافية..


آخر تعديل بواسطة فيصل H في 23 أكتوبر 2008, 10:23، عدل 1 مرة

أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 22 أكتوبر 2008, 20:36 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

الأخ حسن حامد

هوي يا جماعة نعرفكم بأخونا في الله حسن حامد.. زولكم أتي من قطر لقضاء إجازته السنوية في كسلا وسط أهله وأحبابه واصدقائه... والزول كمل معظم إجازته فى الخرطوم حايم ما بين جهاز المغتربين ودفع الضرائب والأتاوات المفروضة على المغتربين وبين حجوزات الطيران، وبين البنوك لتغيير العملة.ز وأخونا ما صدق وصل كسلا.. كدي يا الطيب جلّس الزول ده جنبك.. وخليهو يحكي لينا ذكرياته في قطر.. وكيفن وجد كسلا بعد طول فترة غياب عنها.. يا عبد المتعال ألحق زولنا بفنجان بكرى كارب وألحقوه بالتنوة .. ويا شيكيت كدي أمرق مع ضيفنا من راكوبتنا دي معاك جعلي المتمة ووديهو الساقية خليهو يتفسح شوية، وأديهو ياكل من المنقة البلدية والفونس وقلب التور وكما ن من القرين فورت الأحمر ومن البرتكان واليوسف أفندي والجوافة.. وجيبوا معاكم في القفة دى فواكه لضيوف جبنتنا الكرام.. لأنو جبنتنا إذا ما عملت فرشة في البطن لا تشرب منها.. قوية جداً القوي الله..
أها يا شيكيت ويا الجعلي إن شاء الله يكون اخونا حسن حامد إتكيف من سواقينا ومن مناظرها الجميلة جداً.. وغيّر كمان شوية هواء نقي 100% وخاصة لوجاء مريتوا كلكم جنب فرايد البرسيم المسقيات ديلك.. أخونا شيكيت ساررني في أضاني قال لي: حسن حامد إتفسح ومبسوط من السواقي الجنوبية عامة ومن جبنتنا خاصة..
أها يا جماعة صاحبنا وضيفنا حسن حامد قال خلاص ماشي.. لأنو بعد يومين شادي الرحال وراجع لعمله في قطر.. أها يا اخوي حسن في وداعة الكريم الذى لا تضيع ودائعه وربنا يوصلك للدوحة القطرية بسلام وأمان..


أعلى
 ;
 
 عنوان المشاركة: Re: فنجان جبنة في توتيل مع الأستاذ فيصل H
مشاركةمرسل: 22 أكتوبر 2008, 20:43 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 05 أكتوبر 2008, 09:40
مشاركات: 2364
مواضيع: 258

عمنا فيصل الزيك انشالله تمااااااام

شنو البخالة دي ماتعزمونا معاكم فنجان جبنة

_________________
ان يكن صمتى رهيبا .. إن فى الصمت كلاما


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 23 أكتوبر 2008, 10:15 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

عمنا فيصل الزيك انشالله تمااااااام

شنو البخالة دي ماتعزمونا معاكم فنجان جبنة

الأخ جبارة محمد أحمد

ليس هناك بخل.. جبنتنا لكل الحبايب بدون فرز..
وأصبر لنا في اليومين القادمين سوف نعزمك مع الشلة..
بس أمبارح البن كمل وكمان كانت الجبنة لناس محدودين
وصلوا قبلك فى الترتيب التسلسلي.. ويوم جبنتك حيكون يوم
عجيب بكل معنى الكلمة.. وفتك بعافية..


أعلى
 ;
 
 عنوان المشاركة: Re: فنجان جبنة في توتيل مع الأستاذ فيصل H
مشاركةمرسل: 23 أكتوبر 2008, 10:32 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 05 أكتوبر 2008, 09:40
مشاركات: 2364
مواضيع: 258
تشكر ياعم فيصل

وماتنسي البن لازم يكون حبشي
والفنجان يكون متوسط


شكرا وتسلم دوما

_________________
ان يكن صمتى رهيبا .. إن فى الصمت كلاما


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 25 أكتوبر 2008, 20:14 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59
[size=150]
الأخ جبارة محمد احمد
يا جماعة الخير اليوم عازمين لينا زول وزعيم كبير فى القريفة للجبنة .. ويا جماعة أقولكم الزول تب راجلاً مو ساهل.. وجايينا من مدينة كسلا وبالتحديد من حتة شوية بعيدة حبة من وسط سوق كسلا.. واخونا جبارة قادم لنا من مربع26 ويمكن زولنا ده يجي لينا بمواصلات المربعات .. إما يركب من محطة النوراب ويتجه شرقاً أو بمواصلات الختمية الجديدة ويركب من محطة جامع الختمية ويتجه غرباً لغاية ما يجي السوق ويركب مواصلات السواقي الجنوبية أمام السينما الوطنية..
وأخونا جبارة يا جماعة الخير ما زولاً غريب عندنا.. أتاريهو الراجل قريب ناس أحمد دياب وناس جيلاني وزولكم تب زولاً لينا يا اخوان..
أها يا جماعة زولنا جبارة وصل لينا ومتقريف خلاص لأنو ليهو يومين ما شمالو ريحة بن مقلي..
يا صلاح الطاش جلّس الزول جنبك في البرش ده.. ويا شيكيت أدى الزول عصير ليمون إنتاج ساقيتنا.. كتر ليهو السكر وما تكتر التلج فى الكوز.. ويا ازرق كب الجبنة وأولاً أدى أخونا جبارة فنجان بكري من البن الحبشي لأنو بيحبه موت ولحقوا بالبكرى التاني والتلت.. أها يا جماعة شفتوا صاحبنا يشفط كيف شفطتي شديد.. يازول إنت جايي من وين؟ يا جماعة شوف عيوني عيون أخونا جبارة خلاص فتحت.. وبعدين كب للجماعة الضيوف التانين.. أها يا جماعة شفتوا اخونا جبارة قام سألني بعض ألسئلة عن طفولتي.. بالمناسبة يا أخوى جبارة طفولتي كانت كطفولة الغير تتسم بالبراءة ولكنها كانت مشوبة بالشقاوة.. وفى زمن طفولتنا حتى وصلنا يافعين كنا ونحن صغار نساعد والدنا رحمه الله في عمل الزراعة وكنت اسوق له الساقية خلف البقر وإذا نمت ووقفن البقر اليوم داك موتك اللحمر.. وكما من جلدات كاربات قد اخذناهن منو.. وكنت احش القش للبهائم بتاعة الساقية وغيرهن .. وكنا نرعي الغنم ونحلبها فى المساء.. وكنا نلعب عند المغارب غمدت لبدت وكم فى الخط.. ونسوى سواقي البعر وعربا من علب الصلصة وترتارات من كيزان الصلصة ومن السلك.. يا ازرق كب التنوة لأخونا جبارة ودبلو الحكاية، ثم أعطى الباقين ووزع ليهم الفشار خليهم يقزقزو.. أها شفت يا جبارة برضو نحن صغار كنا نشرك للطير وخاصة العصافير بشرك السبيب والقلوبية وبالطشت والصينية وخاصة في فصل الخريف.. وكنا نعوم فى بير الساقية وفى موية القاش وعمك يا جبارة سباح كارب بالجد حتى تاريخه بس عمك ما دخل منافسة مع البطلين سلطان كيجاب وسارة فضل الله.. كب البكرى يازول للجماعة كلهم.. وبعدين يا جبارة طفولتي كانت يعني شر x شر ومعظمها كانت شكل ودق يوم داقي ويوم داقنك وخاصة فى المدرسة الابتدائية وكذلك المدرسة الوسطى.. ولو شفت راسي محلوق صلعة من كترت الفليق لمن تامن بالجد..
أها يا جماعة أخونا جبارة عاوز يستأذن علشان ماشي من بدري لأهلو فى المربعات من ضوء.. أها معاك سلامة وربنا يوصلك بالسلامة.. الظاهر عليك ناوى تدخل السينما ماشي مننا كدى بدري، الفيلم كابوي ولا شنو.. أها فتناك بعافية وأمان..
[/size]


أعلى
 ;
 
 عنوان المشاركة: فنجان جبنة في توتيل مع الأستاذ فيصل H
مشاركةمرسل: 25 أكتوبر 2008, 20:20 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59
[size=150][font=Arial]
الأخ عبد المتعال

يا زول ألحقنا.. عدة الجبنة كلها ومعاها البن والجنزبيل والفحم والكانون جاء الحرامي وشالهم كلهم
حتى البنابر والبروش والعناقريب الهبابيات شالهم ومعاهم قربة الموية بقرعتها.. المهم أنا فتحت بلاغ..
عشان كده جبنتي تاني ما في نامن نشوف قصة العفش المسروق ده ونقبض على الحرامي.. وفتك بعافية..
[/font][/size]


أعلى
 ;
 
عرض مشاركات سابقة منذ:  مرتبة بواسطة  
إرسال موضوع جديد هذا الموضوع مغلق ، لا تستطيع تعديله أو إضافة الردود عليه  [ 95 مشاركة ]  الانتقال إلى صفحة السابق  1, 2, 3, 4, 5, 6  التالي

جميع الأوقات تستخدم GMT + 3 ساعات


الموجودون الآن

المستخدمون المتصفحون لهذا المنتدى: لا يوجد أعضاء مسجلين متصلين و 1 زائر


لا تستطيع كتابة مواضيع جديدة في هذا المنتدى
لا تستطيع كتابة ردود في هذا المنتدى
لا تستطيع تعديل مشاركاتك في هذا المنتدى
لا تستطيع حذف مشاركاتك في هذا المنتدى
لا تستطيع إرفاق ملف في هذا المنتدى

البحث عن:
الانتقال الى:  
cron

Powered by phpBB © . Design by Art-En
Translated by phpBBArabia