جميع الأوقات تستخدم GMT + 3 ساعات

آخر المشاركات
    .. كسلا الوريفة ..     »  قد يباع التاريخ في كسلا   .:.  اخر رد: عبدو منصور  .:. الردود: 69     .. كسلا الوريفة ..     »  عالم زين   .:.  اخر رد: يوسف حسن العوض  .:. الردود: 0     .. كسلا الوريفة ..     »  حيرة   .:.  اخر رد: الدرديري كباشي الامين  .:. الردود: 560     .. كسلا الوريفة ..     »  اشتقنالك   .:.  اخر رد: خالد عوض السيد  .:. الردود: 0     .. كسلا الوريفة ..     »  الخواء /قصه قصيره   .:.  اخر رد: فايز النورس  .:. الردود: 1     .. كسلا الوريفة ..     »  يا أحبابي أنا جيتكم مهرول   .:.  اخر رد: ابو اسيل  .:. الردود: 9     .. كسلا الوريفة ..     »  دعوة لوالى كسلا في يوم السياحة العالمي   .:.  اخر رد: عبدو منصور  .:. الردود: 1     .. كسلا الوريفة ..     »  قرع طبول في الأحراش (قصة قصيره)   .:.  اخر رد: فايز النورس  .:. الردود: 0     .. كسلا الوريفة ..     »  أيام زمان .. نسخة جديدة منقحة   .:.  اخر رد: الدرديري كباشي الامين  .:. الردود: 221     .. كسلا الوريفة ..     »  شهادة الترابي .. كاد المريب ان يقول خذوني   .:.  اخر رد: عبدو منصور  .:. الردود: 1


إرسال موضوع جديد هذا الموضوع مغلق ، لا تستطيع تعديله أو إضافة الردود عليه  [ 102 مشاركة ]  الانتقال إلى صفحة السابق  1, 2, 3, 4, 5, 6
الكاتب رسالة
 عنوان المشاركة: فنجان القهوة مع الأستاذ صلاح مصطفى
مشاركةمرسل: 14 يونيو 2009, 23:50 
رئيس فخري
غير متصل

اشترك في: 13 إبريل 2007, 22:48
مشاركات: 1084
مواضيع: 85
صلاح الدين مصطفى كتب:
، متعنا الاخ الغالى محجوب ود الباشا برائعة اشلاق البوليس وابو وئام دعم هذا المجهود بالصور كانت اضافة ممتازة0
الاخ الطيب محمود النور تجولنا معه فى شوارع وازقة كسلا تعبنا واستمتعنا روعة ما بعدها روعة ، واستمتعت بقطار الشرق مع صلاح الطاش ود بت العبيدية والطيب وصديق كانت استضافتهم لنا فى سلوم بعد ان سمعنا الطيب يقول لصلاح الطاش سلوم يا صلاح


يا زول إنت ماشي وين ؟ عايزنا نغني :
( خليتينا لي منو ؟ يا السرة خليتينا لي منو ؟ ) أنا يا دوب لقيتك في فرقة ! صلاح الدين الجميل : أربع ليالي :
1/ ليلة في الخرطوم ؟
2/ ليلة في حي العمال ؟
3/ ليلة في القويعية ؟
4/ الليلة هوي يا ليلة ؟
كلامك الفوق زي العايز ( تشتت ) كما جاء في قاموس العامية الجديدة ! إنت ما سمعت بنكتة المسجون بعشرين سنة الدخل السجن أول يوم وجد الجماعة لاعبين حريق سأل من ( الفورة ) قالوا ليه : خمسة الاف واربعمية قال : ( لاحول ولا قوة ) واحد قال ليه : ( اقعد إنت لاحق شنو ؟ ) تحياتي صلاح .


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 15 يونيو 2009, 06:28 
رئيس فخري
غير متصل

اشترك في: 24 يوليو 2007, 11:24
مشاركات: 3088
مواضيع: 395
عزيزي أبو الخير
صباح الخير

من وحي مشاركة أخونا صلاح الطاش أعلاه .... سؤال برئ جدا جدا جدا ....

هل من حق الضيف على الفنجان أن "يشتت" كدا براه بدون استشارة الجمهور المستمتع أم أن هذه طبخة تمت بليل مع ود رحمة أو حاجة السرة؟

مع عاطر تحياتي

_________________
يا حليل الانجليز


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 15 يونيو 2009, 11:04 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 19 فبراير 2008, 15:43
مشاركات: 3951
مواضيع: 380
اقتباس:
هل من حق الضيف على الفنجان أن "يشتت" كدا براه بدون استشارة الجمهور المستمتع أم أن هذه طبخة تمت بليل مع ود رحمة أو حاجة السرة؟

الغالي ابوهالة وصحبه الكرام
الاستاذ صلاح ابن ريف قبل ان يكون ابن مدينة والعكس صحيح ... فهو يعرف عادات وطقوس الجبنة
شاهد عيان قال لي الزول ده لحد حسع بيشيل " عدة الجبنة في الخرتاية " وكدا اطمأنكم بانه عائد
وسيواصل معكم حتي موعد الختام نهاية الاسبوع فقط شوية مشغوليات حامياه يتواصل معاكم ..
وبعدها انشاء الله حيرشح لينا الضيف القادم من القائمة التي ذكرها اخونا صديق ..ونحن نتشرف بهم في فنجان جبنة باستراحة توتيل .. لكم مودتي

_________________

اللهم اجعلنا ممن يحافظ على صلاة الفجر,,, ونجينا من عذاب القبر ,,,, وضربات الشجاع الاقرع


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 16 يونيو 2009, 10:56 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
[size=150]الاخ صلاح الطاش متعك الله بالصحة
اها الزوقان ده خليناهو (( الواحد ما يعرف يكب الزوقة فى البلد دى )) عاوزين نشتت (( هى الكلمه دى صحيحة هى فيها كم شاء )) اول شى مدخل ليك المفردات دى ناس شتت ونفطت وكمان جابت ليها كلمة فله عندى الولد جبت ليهو جاحات لما استلمها قال لى شكرا يا فله ، انا زعلت وامو قالت لى انسى دى كلمات من التلفزيون والنت ، يا وليه فله دى كلمة كنا نسمى بيها الكلاب مش الضكر كمان نسمى بيها الكلبه الانتايه ،
ليلة فى الخرطوم كنا انا والاخ محمد خضر كمير خارجين من الداخلية بتاعة المعهد (( وانت عارف خارجين ليه)) والدنيا ليل فى لفة جات واحدة بنت من دولة مجاورة لابسه موضة وسكرانه وطوالى وقفت ورانا يعنى عشان نحميها طبعا نحن ما عارفين سبب خوفا شنو ، فجاة جاء واحد محترم بى عربية تلمع نزل وجاء ماشى علينا فى شنو يا اخينا هو زاتو سكران انا عاوز البت ، طيب نتفاهم ما فى كلام فى اللحظة دى مشى للعربيه جاب شى بس ختاهو فى جيبو طبعا قلت ليهو البت ما لا فى شنو وما حتسوقا طبعا مع النقاش محمد خضر قال لى بعد ما ساقنى بعيد ومعانا البت ياخى سيبك من المشاكل خليهم يمشو ، قلت لمحمد خضر كمير لو خليناهو والبت اتحامت بينا نبقى 00000000 عارف ، يا بت ساكنه وين طبعا مافى اجابه ، غايتو الحل الوسط للمشكلة فى كوافير قريب من حديقة القرشى فيهو من بنات جنسها سلمناها ليهم طبعا الزول ماشى معانا قال يمكن تاخدوها لنفسكم 0
طيب لو سمحت يا صلاح فى قصة تانية طريفه مره انا ومحمد كمير وصلاح الخليفة ماشين قريب من كبرى المسلميه مرو بى جنبنا رتل مقدر من الشماسه (( الاولاد الصغار )) ونحن كنا نحاول العبور من مستشفى الشعب فى اتجاه كبرى المسلمية ‘ فجاة سمعنا مراه تكورك تخيل هذا الرتل هجم عليها هجمة ولد واحد محاولين يشيلو الشنطة والساعة ، الحمد الله كنا قريبين جرينا عليهم لما شافونا جرو طبعا جرينا وراهم لما اختفو بين عربات السكة حديد جينا راجعين صلاح الخليفة بيسال وين محمد خضر انا قلت ليهو كان وراك اتارى محمد كمير جرى شويه والظاهر فى حديدة فى النجيلة التحت الكبرى جرحتو ، طبعا لقينا المره بتعمل ليهو اسعافات اولية
ليلة فى حى العمال يا اخى دى ليالى لكن الليلة الحذكرا دى خاصة بيك انته ، تذكر كان عندك بنطلون كوردرويت جديد وكنا ماشين بالليل وهجم كلب شرط البنطلون طبعا بوظو رقعة ما تنفع طبعا زعلت وزعلنى معاك بس برضو ضحكنا كان عجبك
ليلة فى القويعية ، القويعية روتين قاتل منطقة صغيرة من الصباح تعج بالحركة بس تجى الساعة اربعة البدو يرجعو الهجر يفضل فيها قليل من الاجانب غايتو قناة النيل الازرق ومنتدى كسلا عاملين شغل تمام
الليلة هوى يا ليلة دى قصة مشينا حفلة فى قرية 21 حلفا الجديدة عرس تبع ناس الاخ الصديق طلعت جمبلان ، طبعا كنا نرصد ونتلمس تعليقات اهلنا الحلفاويين طبعا انا ما كنت غريب لكن محمد خضر وصلاح الخليفة كانو غرباء لانو انا بعرف عدد مقدر من ابناء القرية ، طبعا وصلنا حلفا ركبنا برنسة من السوق الى القرية 21 طبعا كان معانا مجموعة من الركاب من ناس القرية ، لما وصلنا كبرى فى احدى الترع واحد من الركاب قال للسواق بالله ما تنسي تقيف فى بنك الدم ، طبعا انا سالت الحلفاوى الجنبى شنو يا اخينا بنك الدم ده فى الخلا ده ، قال لى ما تستعجل يا ابن العم حتعرف براك ، طلع بنك الدم الكمبو بيصنعو فيه العرقى 0
وصلنا القرية دخلنا ديوان لقينا جماعة بتلعب كوتشينة سلمنا وجلسنا لقينا واحد قزم بيلعب معاهم يعتبر اقصر بنى ادم فى الدنيا وعامل خنفس وبنطلون جينز ، الزول ده يا جماعة قرب يفرتك الحفلة لانو فى واحد بس قال ليهو مصطفى الليلة بلو جنيز ، كل الشكلة الناس تحجز وواحد شايلو زى الطفل الصغير، يقول ليهو مصطفى الحاصل شنو ، يقول (( ليه يقول لى بلو جينز يقصد شنو ))
الحفلة كان المسرح ترلة بتاعة جرار تركتور بى اربعة كفرات الحفلة بدت بى ثنائى من مصنع السكر طبعا اهلنا الحلفاوين ما راكب ليهم غناء الرق عاوزين رطانه تعال اسمع الاحتجاجات يا محمد جيب التركتر وجر الترلة وديهم المصنع ، ياخى الناس دى ما تراعى شعورنا ، طبعا الناس كلها محتجه فى واحد تجراء ومشى قدام الفنانين وكانو بيغنو هو يا ليلة من المحطة لفريق القطاطى قال ليهم اسمعو الكلام ده نحن بصراحة ما فاهمنو خلاص مشكورين يلا انزلو ، طبعا نزلو وبدا الغناء بالطار حتى طلوع الشمس0
طبعا لما جات سيرة الاخ طلعت جمبلان الصديق العزير المرح ، طلعت جانا من وادى حلفا اتولد هناك لغاية ما كبر ، طبعا اخونا عادل بيرم كان المرافق والدليل بتاعم ، تخيل لافى بيهم فى كسلا لما جو جنب مبنى المحكمة قال ليهم ده العقل الالكترونى بتاع كسلا طبعا شبابيك المحكمة بارزة لى بره
وكنا لما نقعد نتونس عادل بيرم بيقول لينا يا جماعة اخونا طلعت ده العربى بتاعو لسه ريدر ون يعنى كلمات صعبه مافى وكنت مرات اقول لى طلعت تعرف يا اخ طلعت انا مره قابلت بت سمحة يعنى جميلة اشرنكيل وبديت ادردش معاها لما فصلت معاى هنا اخونا طلعت بعد اشرنكيل ما فاهم حاجة غايتو مع المدرسة والونسة فى الحلة تحسنت اللغة العربية0 وحصل ريدر فايف
على طارى احبائى الحلفاويين كنا فى المتوسطة بانت كان معانا اخونا ابراهيم ختام حلفاوى اصيل كان استاذ جعفر عليه رحمة الله بيدرسنا لغة عربية ، وكان مقرر لينا كتاب الايام للدكتور طه حسين ، استاذ جعفر كان بالدور يقيف الواحد ويقرا صفحة وبعدها يقوم يشرح لما جاء الدور على ابراهيم ختام بدا يقرا قام استاذ جعفر قال ليهو يا ابراهيم ختام كدى اعرب لينا الكلمة دى ابراهيم ختام خته الكتاب وقال للاستاذ (( استاذ انته وقفتنا عشان نقرا ولا عشان نعرب )) 0
/size]


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 17 يونيو 2009, 09:47 
مشرف منتدى
غير متصل

اشترك في: 21 يونيو 2007, 10:14
مشاركات: 1016
مواضيع: 110
الأستاذ الرائع / صلاح .. متعك الله بالصحة والعافية
والله جبنتك كاربة .. ريحة بنها يجيب الطاش .. بس الله يصلح حال كفلاءنا ( في الشغل والبيت ) ماخدين وقتنا كله .. فالمعذرة على وقوفنا كمتفرجين .. وانها لمتعة.
استاذنا الجليل .. التطور الذي حدث لشتى مناحي الحياة جعل الحياة سهلة .. سريعة الايقاع بفعل التقنيات .. عكس ماكان في سابق الزمان .. سؤالي .. الفرد منا كان يبحث ويلهث خلف الحصول على كتاب .. للاستمتاع .. ولاضافة معرفة جديدة ... لذالك حسب اعتقادي الحادث الآن تدني مريع في الثقافة .. مما انعكس على سلوك الفرد .. وبالتالي القى بظلاله على شرائح المجتمع المختلفة . هل للتقنيات أثر في ذلك ؟؟؟
ودمت في عافية.


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 17 يونيو 2009, 19:20 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
ابو هاله متعك الله بالصحة والعافية
كنت عاوز ازوق لكن كان هناك تمديد لمدة اسبوع لانو المدة انتهت ، ادونى دقائق زيادة وطبعا انا رتبت الامور للدكتور احمد الامين هارون واتفقت مع السرة تواصل معاهو ، ابو هاله السلام امانه تسلمى للدكتور الطاهر صديق سلام شديد لى زمن ما شفتو ولو امكن تلفونو لو امكن والله مشتاق ليهو شديد وتحياتى كمان للاخ كمال ، والاخ على وسليمان وحسبو والاخ صلاح وربنا يحفظهم من العين امين يا رب العالمين ،0
عاوز اتطرق لموضوع راجل المره حلو حلا فى البوست الجاى وقبلو عن صديق عزيز وفتك بعافية يا خال0


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 17 يونيو 2009, 19:49 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
الاخ ابراهيم احمد ادم متعك الله بالصحة والعافية
الكتاب ما زال وسيظل كما عهدناه رغم الوسائل الحديثة ، اذا نظرنا الى الناس من ناحية انشغالهم عن المطالعة فهذا متروك لمزاج الشخص قد يكون من الاساس لا يحب المطالعة اما من كان يمارس هذه الهواية واثرت فيه الطفرة ووسائل الترفيه فاكيد يكون هذا لفترة مؤقته 0
المكتبات ، ومعرض الكتاب التى تقام هنا وهناك دليل تفرد الكتاب ، فعلا الحياة اصبح ايقاعها سريع فى كل المناحى ولكن فى نظرى الكتاب والمطالعة كما هى لن ولن تتبدل وكذا الحال الجرائد ادمان تصفحها مع فنجان او كباية شاى صباحية متعة ومجمل القول العيون ترتاح لقراءة الكتاب ومتصالحه معه 0


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 18 يونيو 2009, 22:36 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
محمد خضر كمير
شخص فريد سهل التعامل معه ، كن نعرفه من بعيد اسما ولكن لم ندخل فيه ، كنا نتمرن فى ميدان المريخ ، كان هو فى تلك الاثناء يقيف ويتفرج علينا ومن ثم يركب الباص ويتوجه للشرق كان هذا برنامجه ، قلت للاخ صلاح الخليفة الزول ده غامض يا اخى كدى ما نتعرف عليهو ، فعلا تم اختراقه وتم التعارف بيننا وبدات العلاقة 0
عرفته منظما لدرجة ان تشفق عليه من النظام بالو طويل يمكن ان يمكث اكتر من نصف ساعة يكوى البنطلون ، يحب النظافة ويكره البهدله ، مثقف محاور ممتاز هادى لدرجة تسبب لنا الضيق انا وصلاح الخليفة 0
عاشرناهو فى الخرطوم وادبنا جنس ادب عندما نريد ان نخرج لابد ان يتمم على لبسنا وهدامنا ، مره كنا خارجين من سكن معهد الموسيقى الصباح عندنا مشوار للكلاكلة صبعا لبسنا انا وصلاح بسرعة وانتظرناهو يطلع من الحمام ، جاء داخل الغرفة لقى صلاح لابس جلابيه ولافى شال طوال شنو وين ده لبس غير البس بنطلون وقميص انته عارف ماشى وين صلاح يقول ليهو ما الكلاكلة ، لا قبل الكلاكلة نحن حنفطر فى كافتيريا الاطباء فى المستشفى ، ياخى نحن اكل شنو فى المستشفى خلينا ياخى ناكل فى اى حته تانى ، يا صلاح جرب ، فجاة قبل على انا انته كدى قوم اقيف ايوه كده تمام ، طبعا مشينا الكافتيريا المعنية طبعا جو مرطب مكيفات طرابيز نظيفة خدمة خمسة نجوم ، من هناك خرجنا الى موقف الكلاكلة ، طبعا ازمة مواصلات نحن واقفين جاء بكس انا وصلاح كابسنا وركبنا محمد اركب يا خى طبعا قال لينا انزلو ، كده طريقه ما سياحية نصل مغبرين طبعا نحن المساكين نزلنا 0
طبعا يوم الخميس يختار الاماكن لزوم السهر مره نادى بنك السودان ، نادى السجاير ، نادى الاطباء، طبعا المواصلات تاكسي خاصة اذا صادف اخر شهر ، وحافظ تعريفة التاكسى وكان بتعلن فى الجرايد وطبعا العشاء يقيف بى نفسو فى تنظيمو مع طباخ النادى ، قمر العيش لو سمحت ، بالله من البصل داك شويه الشيه ما تحرقا كده كفاية 0
وفى محل المرطبات ده موال تانى اول شى يدخل يغسل الكبابى بى نفسه ، صلاح الخليفة يقول لى ما كان افضل لينا نشيل شنطه ونخت الكبابى خاصة بينا بدل العطله دى 0
كم مشتاق لى هذا الرجل واحزننى فقد اخيه عبد المنعم 0


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 19 يونيو 2009, 15:11 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
راجل المره حلو حلا
فى السابق كان ابوقجيجه هو سيد الموقف لدى الفتيات وتغنو له احب ابو قجيجة اريت بو صلعه طاير كانت المنافسة محصوره بين ابوقجيجة وابو صلعة ، وكلاهما رغم حده المنافسة يجد نصيبه لسهولة الزواج 0
مرحلة المدرس الذى دخل المنافسة لكن بشروط
الماشى لى باريس جيب لى معاك عريس شرطا يكون لبيس ومن هيئة التدريس ، هذا الشرط جعل عملية النقاوة والفريز واضحة يعنى المدرس ابو جلابيه يحق له المنافسة ولكن بفرصة واحده ان يكون غالب يعنى التعادل بنزلو الدرجة التانية وبرضو وجد نصيبه يعنى لو صرف فروقات او من صرف كادر الهندى والعاقبة عندكم فى المسرات بتعمل شغل كويس 0
وبين هذا وذاك هناك فئات حسب تقسيمات المرحوم ود بخيت من قوى الشعب العاملة وبجميع فئاتها كان لها نصيبها من الزواج تحت بند السترة والقسمة والنصيب والامور ماشة 0
اما من اخطر المراحل هى مرحلة شنط البترول وما بعدها وتلك المرحلتين بينها رباط وثيق ، ووصلنا لمرحلة بس قول يا لطيف 0 يا مغترب يا مغترب وحبيبى سافر دبى ورا ورا والترلة وهلم جر ، ودخل المنافسة مع المغترب بعد فك التسجيلات ود الغرب وكان التفضيل تكاد لا تشعر به (( يا مغترب يا ود غرب )) وان كان كلمة مغترب تكاد تكون قريبه من كلمة غرب بفرق حرفين الميم يعنى مسافر وحرف التاء يعنى تعب شوية 0
اما هذه المرحلة وهى التى نعيشها الان من اخطر المراحل ، بدات هذه المرحلة بى شوية مناكفة بين نساء المغتربين والبنات الغير متزوجات وبى حمرة عين بيقولو ليهم انتو ما خلاص عليكم تربو العيال ونحنه نهتم ليكم بابو العيال ، الشغله دى اثارت حفيظة نسوان المغتربين ، يعنى الراجل ما يسافر براهو كان كسر رقبتو كش وين عاد افكك للبنات البجحات ديل رجلى فوق رجللك ، يا فلانه كيف خليتى ابو محمد يسافر براهو والله انتى قلبك قوى، غايتو يا فلانه كان رجع ليك وما عامل حاجة تانى ما تخليهو يمشى براهو غايتو الله يستر كان ما عملا 0
ويدخل الرجل المتزوج (( راجل المره )) المنافسة وبعد عدة تجارب ناجحة وينتشر الخبر ان راجل المره ده نوعية متميزة ، والله طيب كان شفتيهو وفاقد حنان والله مسكين اتارى مرتو مورياهو الويل لكن عيبو بس كلامو كتير وشكاى 0
وياتينا الصارخ من حلة قدام :--
اتلمو رجال الحلة ديل حلفو على اسم الله وانا حلفت بى الله راجل المره ما بتخلا
(( يعنى كده اصبحنا هدف استراتيجى واعمل حسابكم هدف استراتيجى يعنى هدف مشروع ))
رجال الحلة مع البت يا بت الراجل متزوج وعندو اولاد انتى زاتك الجابو ليك شنو ؟
انا بقابلو بالضرا انا بعرسو بابشرا --- يعنى الفكى جاهو رزق
يا بت الناس حصلت تعرسيهو بالفقراء
انا بقابلو بى غادى انا بعرسو بالقاضى
كماااااااااان لا حول ولا قوه
انشاء الله كان راجل اختى
كمان حصلت لو كان معرس اختك انتى يا بت الكلام ده الدخلو راسك شنو ؟
لا بنركب دفار ولا بناكل باسطة سلا آآآآآآآى مقدرة راجل المره حلو حلا
يا بت الناس هو اشتكى ليك ؟؟؟؟؟؟؟؟؟
العجوزة المرضانه تمسح بالديانا والوش حالتو تعبانة مغرزة راجل المره حلو حلا
ود الصافى : باقيلك يا ابو محمد البت ما بتكلم صح
ابو محمد : ود الصافى انته حاجى بيت الله الكلام ده شنو عجبك
ود الصافى : اسمعو يا رجال والله ماى فايده مع البت دى غايتو معرساهو معرساهو


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 20 يونيو 2009, 17:44 
رئيس فخري
صورة العضو الشخصية
غير متصل

اشترك في: 23 أغسطس 2007, 10:48
مشاركات: 3532
مواضيع: 59

الأخ صلاح مصطفي

ماشاء الله تبارك الله على نفسك الطويل معنا..
ولنا بعض الأسئلة التالية.. أرجو أن تجيب عليها بشفافية...
1- أيهما أفضل زواج الأقارب أم الزواج من غير الأهل؟
2- القعدات في قاموسكم أيام الشباب والعنترة+ الحلل المجقجقة + الغناء بالكبريت!!!
3- السينما الشرقية والسينما الوطنية أيهما تفضل الدخول إليها؟
4- أفلام كابوي لازالت راسخة فى الذاكرة من سينما كسلا!!!
5- هل الزواج المبكر أفضل من المتأخر؟ ولماذا؟
ولنا عودة يا أخوي أكرب بطنك وحزامك؟


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 22 يونيو 2009, 10:06 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 21 مايو 2006, 09:32
مشاركات: 1547
مواضيع: 113
مكان: متحدرٌ من ذروة تعب

الأستاذ صلاح
متابعين بلذة ومتعة ... وخوفنا الكرسي ينتهي لكن دوماً الأستاذ فيصل إتش ينجدنا ويلحقنا في الملمات الصعيبة
هههههههههه
ربنا يعينكـ ومتابعين ......


_________________
صورة
صورة
صورة


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 22 يونيو 2009, 19:23 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
الاستاذ الموقر / فيصل اتش متعك الله بالصحة والعافية
خمسة اسئلة منها عن الزواج ومنها ثلاثة مسائية كدى نشرب فنجان بكرى وندمج السؤال الاول مع السؤال الخامس عن الزواج اولا زواج الاقارب له محاسنو وعيوبه وكذا زواج الغريبه وفى كلتا الحالتين حسن الاختيار هو الاساس 0
زواج الاقارب من عيوبه احتمال ظهور الامراض الوراثيه فى النسل كبيره عكس الزواج من بعيد ،لكن كما ذكرنا حسن الاختيار هو الاساس ، بس لكن القريبة بستحمل الضيوف اما الغريبة فالعكس تماما وهذا ايضا ليس تعميما ، (( ود الحيشان التلاته ، عرستو ضوت السباته )) المقطع ده بيحسس الواحد انو الزول ده عرس بت عمو لزم يعنى العريس يكون من الحوش الاول والعروس من الحوش التالت ولكن تانى فى مقطع (( تلاته قدور صندليه ، تلاته محلبية ، تلاته سرتية ، نسيبتو قالت شوية حرمان ما يدخلنا على )) ده يديك احساس انو الزول ده عرس من بعيد ، بعدين يا جماعة القدرة دى قدر شنو بالذات الصندلية الشى غالية جدا 0
ليالى الخميس او الويك اند ، كدى احكى ليك القصة دى صادف احد المعلمين نازل ضيف مع احد الاخوان بحى العمال ، طبعا الشيرنق من الصباح اجمع وتم شراء اللحوم وتوابعها لكن المشكلة فى المكان لانو العدد كبير وبعد مداولات تم التوصل ان يكون مكان العزومة الفسحة ما بين مدرسة حى العمال المتوسطة بنات والسواقى ، مكان هادى وبعيد عن العمار والرملة بيضاء والقمرة كبيرة ، طبعا الناس ابتهجت والغناء والبشير ، وطبعا فى بعض من اعضاء اللجنة التنفيذية المنظمة للحفل من شدة التعب نامو ، ونحن فى عز الابتهاج فجاة تقف عربة النجده بيجو استيشن وينزل الجنود وتسمع قف مكانك لا تتحرك (( قف مكانك يا مسجون لا تتحرك دى فى كتاب حسن البطل قصة المسجون الهارب تانية اولية بالقديم )) ، طبعا كان الناس الينقبضو بالليل الساعة تسعة صباحا تانى يوم بيجلدوهم وسط السوق ، يا جماعة دى ورطة شنو وطبعا المعروضات تم التحفظ عليها ، وبحكم انا واحد الاخوة اولاد بوليس قلنا نستعمل بعض الصلاحيات ، مشينا على العربية كان فى واحد قدام ما نزل سلمنا عليه وطبعا عرفناهو طلع واحد من ابناء الاشلاق من الذين ورثو المهنة ، المشكلة غايتو انتهت بسلام وطبعا واصلنا الحفل وما زال الليل طفل يحبو ، بعد داك ظهرت العنترية واحد قال هم اربعة ونحن كتار كان نكتفم ونخليهم ونمشى 0
اطرف موقف فى هذه الواقعة (( لكن دى عاوزة وصف دقيق )) عربية الشرطة لما وصلت عندنا كانت طافية النور مع الجوطة طبعا ما شعرنا بيها لما وقف نور النور طبعا مع غبار السيارة وشعاع النور طبعا تحت الشعاع بيكون عامل ضل بطول الشعاع فى واحد اخونا كان بيحبى تحت الشعاع عشان يكب الزوقة لكن عندما وصل حد معين كان فى عسكرى واقف قدامو عديل ، لما سالناهو انت فكرت كانت شنو ، قال كنت قايل الناس ما شافينى مع الجوطة وجرى 0
برضو اخونا واحد كان نايم لما صحو قام طوالى مشى على العربية عشان يركب 0
السينما الوطنية والشرقية ، كنا نفضل الوطنية لانو قريبة من موقف الباصات وفى مقولة انو السينما الشرقية بتاثر على النظر وطبعا كنا نحافظ على نظرنا عشان الكلية الحربية والشرطة ، السجون لا 0
افلام الكابوى عودة ديجانقو ، سراتنا لا يرحم ، البئر الثالثة ، ارتباط هذه الافلام بشجر النيم فى شارع المستشفى تلقى البوستر بتاع الفلم ملصق فى شجر النيم تقريبا وانته جاى من موقف التاكسى الى المستشفى الشجرة التانية بيكون ملصق فيها واحدثم الخامسة ثم اخر شجرة ومنها البوستة 0
مرة كان معلق بوستر يا زول الحصين وطواقى المكسيك والمسدسات منظفة ومزيته وجاهزة وكلمة كميرا اسكوب مكتوبة ، يعنى الفليم ما بيتفوت جينا طبعا المساء ودخلنا الفليم ، بدا الفليم ضرب مافى تحمير ساكت مافى البار الناس تشرب وتخرج مافى ، اخر ادب ياجماعة الكابويات ديل مالم الليلة الحاصل شنو جنو ، نصف الفليم مشى يا جماعة شكلة عركه واحدة ليك امان الله مافى اى طلقة حتى لو كانت مبلولة بى موية ما ضربت ولا بنيه مافى ، طلعنا طبعا (( السينما اونطه هاتو فلوسنا )0
الزواج المبكر زى الانزار المبكر 0


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 24 يونيو 2009, 12:37 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 19 فبراير 2008, 15:43
مشاركات: 3951
مواضيع: 380
الأحباب الكرام ... في الرابع والعشرون من مايو كنا علي الموعد مع الاستاذ القدير صلاح الدين مصطفي ... ومن خلال عطائه عبر جلسة الفنجان تعرفنا عليه وتعمقنا في دواخله فوجدناه نقي السريرة وعفيف اللسان ... واليوم نختم جلستنا بعد مرور شهر كامل قضيناه في ضيافته له مني كل الشكر والامتنان ... واترك المجال ... لاخونا المنحدر من زرة تعب ... وكما يحلو لاخونا عبدالمتعال اليك الماكرفون اخي صديق لتشد لنا لحن الختام ..

_________________

اللهم اجعلنا ممن يحافظ على صلاة الفجر,,, ونجينا من عذاب القبر ,,,, وضربات الشجاع الاقرع


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 24 يونيو 2009, 15:31 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 21 مايو 2006, 09:32
مشاركات: 1547
مواضيع: 113
مكان: متحدرٌ من ذروة تعب

أخي الحبيب أبو الخير
سبقتني في وداع أستاذي العزيز صلاح الدين .. ولم تتركـ لي ما أقوله بخصوص الوداع ... فقد أمضينا في ركنه الجميل الشهر ولا تزال نخلة الروح قيد إنتشاء حينما عمّد أستاذنا العظيم صلاح الحروف بالحنين وأكمل مفازة الحكي بذكريات ماثلة وارفة أستدعى صباحاتٍ جميلة كانت على حافة النسيان فغمس فيها مساراته الرائعة وأخرجها من مداراتها التائهة فاعاد كل ذكرى لبوتقها الجميلة ورسم ظلالاً وارفة التمدد أنتعلت أحذية النشوة والجمال ومشت نحو مفازاتها القصوى كعباءة القمر السطيع ... حتى صارت مهرجاناً للفرح الجهير ...
سافر بنا في فضاءات المنتهى ... وداعب شفافية اليقظة ... وأهال متون الزهد وفيوض التعفف بقلم مديد يتسع لأجيالٍ وأوطان .. لم ينسى في جولاته الحثيثة شوارع الحي البهية وبيوت الجلوص الحنينة ومغامرات الصبا المدهشة طرق جنبات الأدب في تأدبٍ مقيم عرفناه به منذ نعومة أظافره .. وفي تواضع ملازم لقامته السامقة فكان الأعلى فينا ...
أشكركـ أستاذي صلاح على هذا الإندياح الشفيف ، وهذا التوثيق الرائع لحقب رائعة ولأسماء ساطعة ومنيرة في مسيرة الإنسان
أشكركـ إنابة عن أسرة الوريفة .. ,اقدم لكـ أكاليل الحب .... وباقات المعزة والمفخرة .. وشهادات القلوب والأرواح .... ومقامات الأفئدة الحنونة .....
نشكر كل الذين تداعوا الى هذا الركن الجميل ....... ونفتح لكـ الباب لترشيح خلفٍ لكـ يكمل بنا المسيرة نحو الضوء ونحو الذكريات والحقائق المحضة .... فأنتم من علمونا أستقاء الأنوار من هالات المكان والزمان ....
لكـ الود ما ظهر منه وما بطن وما خفى منه وما أعلن ... وما على منه وما هبط .... ولم يبقى لنا إلا أن نهديكـ كلمات يابسة لعلها تستولى على عروش قلبكـ المفتوح والناضح بالمحبة والجمال ....
شكراً جزيلاً وكل عام وأنت بخير .... والبقية تأتي بإذن الله يا أكثر من رائع وجميل


_________________
صورة
صورة
صورة


أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 28 يونيو 2009, 10:37 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
اليوم اخر يوم ، الوداع ، اودعكم لا لا مابقدر ، اودع اودع كيف ، لو باليد ، السرة والله حتوشينى شديد ، تعود بى الذاكرة لحظة مغادرة محلى حلفا الجديدة كسلا عند كمائن الطوب متجها نحو ملوية وكنت اردد اغنية خلاص مفارق كسلا ، واصدقكم القول انا طالب المتوسطة كانت لى قصة حب مع احدى حسان كسلا وكنا لم نستقر بحى العمال مازلنا كنا فى حلفا الجديدة وكنت احضر فى الاجازات وامتدت العلاقة حتى سنى دراستى الجامعية 0
تجولت معكم وشربنا القهوة ، نعم التواصل التقيت باحباء واصدقاء واخوة نجلهم ونحترمهم 0
ابوهاله متعك الله بالصحة والعافية قادر يا كريم ، تواصلك معنا لهو معنى ومقدر عندنا ، ربنا يجمعنا فى ساعة خير 0
الدكتور احمد الامين هارون تشرفنا بمرورك وسعدنا بالتواصل معك هاتفيا وكنت المرشح القادم لكن لظروفك المقدرة من قبلنا المرة دى مسامحين ، تحياتى لك وللاسرة الكريمة 0
الاخ شيكيت الكبير متعك الله بالصحة والعافية ، مرورك الكريم افرحنى جدا وربنا يجمعنا بك وانت متمتع بكامل الصحة والعافية 0
ابو وئام الاخ الرائع البديع تشكر على اتصالاتك وتواصلك واجمل هدية انك جمعتنى باخى واستاذى السر خلف الله ، ربنا يجمعنا بك فى ساعة خير0
ابراهيم حسين مرورك افرحنى وربنا يمتعك بالصحة والعافية والاسرة الكريمة وربنا يجمعنا بكم فى ساعة خير 0
عبد المتعال الرائع رغم انى شفقت عليك من ابو الخير وحسن حامد ما عارف تعاطفت معهم ضدك يوم تسعة تسعة 2009م قرب واتمنى ان اكون معهم اتقديم اقصى ما يمكن تقديمه من دعم ، مرورك المتكرر اسعدنى كتير وربنا يمتعك بالصحة والعافية والاسرة الكريمة 0
حسن حامد مرورك افرحنى واسعدنى كثيرا واسال الله ان يجمعنى بك ، وابقى عشرة على يوم تسعة تسعة 2009م ونحن من خلفكم 0
ابو الخير اما انته يا رجل فلك منى الشكر اجزله وكان مرورك اليومى اكبر محفز لكن بطل شراب البن بالسكر الزيادة ، ياخى جننت السرة زيدى السكر زيدى السكر لما شالت السكرية وختتا جنبك ، طبعا ما اوصيك على الاخت السرة طبعا حتواصل مع الاستاذ / صلاح موسى الطاش وانا كمان دفعت ليها حسابى وحساب الاستاذ صلاح الطاش ، ربنا يجمعنا بك فى ساعة خيروتحياتى للاسرة الكريمة 0
عبد القادر سنوى رغم جياتك بس كانت قصيرة دائما مستعجل ، اتشرفنا بى زيارتك وربنا يجمعنا بيك قريبا ، تحياتى للاسرة الكريمة 0
ابراهيم احمد تحياتى وشرفتنا وسعدنا بك وبجد مرورك اسعدنا وربنا يجمعنا بك فى ساعة خير وتحياتى للاسرة الكريمة 0
الاستاذ الرائع فيصل اتش اسئلة معلمين سعدنا بمداخلاتك البديعة ، السواقى الجنوبية الجميلة من بيت الدجاج حتى السبيل ، اسمتعت جدا بمداخلاتك المناكفه يعنى سده بى سده ، لك منى كل الاحترام والتقدير وتحياتى للاسرة الكريمة0


آخر تعديل بواسطة صلاح الدين مصطفى في 28 يونيو 2009, 10:51، عدل 1 مرة

أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 28 يونيو 2009, 10:48 
كسلاوي يملا العين
كسلاوي يملا العين
غير متصل

اشترك في: 11 أغسطس 2008, 14:23
مشاركات: 246
مواضيع: 18
صلاح موسى ود الطاش الاخ والصديق كنت ساكتب عن ايام الاغتراب الاولى تدرجا من الهوندا الصغيرة ثم الكورلا البيضاء والمسجل الجميل ، واستمعنا الى تسجيل نقل وقائع العقد من المراسلة الاخت الكريمة فى فسحة البوادى فرحنا وسعدنا ومكتب الدكتور عبد اللطيف العمرى وابراهيم البدرى من التور لاى الجنرال موتور والمرحوم عمك محجوب ويسرى المصرى ايام تاسيس الشركات وتصفية الاجهورى 0وتحياتى للاسرة الكريمة
صديق ود رحمة التلميذ المشاغب والشاعر المجيد ، مداخلاتك كانت قليلة جدا لم ترض طموح المنتدى ، وربيعة كانت نجمتنا الاولى يوم اهلت تشرفنا بحضورك وتحياتى للاسرة الكريمة 0
المرشح القادم :--
صديق ود رحمة الصفقة تمت لكن الزول ده عندو طلبات اول شى عاوز موتر سوزوكى احمر وايجار بيت وساعة ستيزن وكدارة بلاستيك وفتح حساب فى البوستةوتمديد عقد السرة لزوم التفرغ والاحتراف ، طبعا انا وافقت على الشروط على طول0
المرشح القادم هو شخص غنى عن التعريف الاستاذ / صلاح موسى الطاش0



أعلى
 ;
 
 عنوان المشاركة: فنجان القهوة مع الأستاذ صلاح مصطفى
مشاركةمرسل: 28 يونيو 2009, 14:39 
كسلاوي فوق العادة
كسلاوي فوق العادة
صورة العضو الشخصية
غير متصل

اشترك في: 19 فبراير 2008, 15:43
مشاركات: 3951
مواضيع: 380
فاصلة للإندهاش : الي استاذنا صلاح الدين مصطفي
لكم هو صعب جداً علي .... أن أُعَقب على قامة مديدة..مثلك .. سيما وأن يكون
التمحور عن هرم كسلاوي أعجز...أن أصفه بكليماتي الهزيلة ..
تمنيت ان انشد لك تشكراتي عبرالحروف الحايمة فى بطن الكتب قدر الخيال ما مد ايدو ..
فقط استميحك عزراً لاكتفي واستسلم لعجزي عن الكلام ..
لك مني عاطر التحايا .. وفائق التقدير علي اثراء المكان .. وحتماً سنجدك في الدروب الوارفة عبر كشكول ..
الوريفة التي انت احد اركانها .. والي الملتقي ... لك تقديري وامتناني
..

_________________

اللهم اجعلنا ممن يحافظ على صلاة الفجر,,, ونجينا من عذاب القبر ,,,, وضربات الشجاع الاقرع


أعلى
 ;
 
عرض مشاركات سابقة منذ:  مرتبة بواسطة  
إرسال موضوع جديد هذا الموضوع مغلق ، لا تستطيع تعديله أو إضافة الردود عليه  [ 102 مشاركة ]  الانتقال إلى صفحة السابق  1, 2, 3, 4, 5, 6

جميع الأوقات تستخدم GMT + 3 ساعات


الموجودون الآن

المستخدمون المتصفحون لهذا المنتدى: لا يوجد أعضاء مسجلين متصلين و 3 زائر/زوار


لا تستطيع كتابة مواضيع جديدة في هذا المنتدى
لا تستطيع كتابة ردود في هذا المنتدى
لا تستطيع تعديل مشاركاتك في هذا المنتدى
لا تستطيع حذف مشاركاتك في هذا المنتدى
لا تستطيع إرفاق ملف في هذا المنتدى

البحث عن:
الانتقال الى:  

Powered by phpBB © . Design by Art-En
Translated by phpBBArabia